عيد الحب

السلام عليكم ورحمة الله وبركاته

أخوتى الأعزاء سنتحدث عن موضوع مهم جداً

اليوم ١٤-٢-٢٠١٧

١٤-٢ ناس كتير بتقول انه الفالانيتن أو عيد الحب

يعنى بيعتبروا ان الحب ليه عيد يوم محدد بيحتفلوا بيه 

اليوم ده ذكرى وفاة القديس فالنتين الغرب بيعتبروه شهيد وبيحتفلوا بذكراه 

أختلفت الاقاويل عن هذا القديس وأختلفت الاقاويل عن هذه الذكرى هل هى ذكرى ميلاده او ذكرى وفاته والله أعلم بالحقيقة 

مهما كانت قصته فهى لا تعنينا فى شئ

المهم 

ليه بتحددوا يوم للحب وتحتفلوا بيه وتجيبوا الهدايا ودباديب وورد وتلبسوا ملابس حمراء وتسهروا وتقولوا كلام حب فى اليوم ده واللى مش بيعمل كدة بعتبروه بخيل أو مش بيحب زوجته او خطيبته او حبيبته 

هو ده الحب فى نظركوا هدايا وكلام حلو حتى لو كل ده كان كذب وغش وكلام من اللسان وليس من القلب

الحب مش كلام وهدايا الحب احساس من القلب ورعاية
الحب أهتمام ومسئولية مش كام كلمة حلوة و أغنية
الحب دعوة حلوة من القلب حتى لو متخاصمين
الحب أحساس جميل مش بيتوصف بالكلام لكن بترجمه الافعال
الحب محتاج قلوب صفيه نقيه مش بتعرف تكذب أو تخون
الحب وعد حقيقى وصادق أنك هتفضل فى القلب مهما يكون
حب الله والحب فى الله أحسن أنواع الحب
الحب أنك عايز حبيبك يبقى معاك فى الجنة
الحب هو أسمى اللغات
فبلاش تفسروه تفسير خاطئ وتظلموا الحب

الحب مش محتاج يوم معين تحتفلوا بيه وباقى الايام مش تهتموا بيه

لا فكروا كويس 

خلوا كل يوم من ايامكم عيد للحب وأهدوا اللى بتحبوهم كل يوم هدية

والهدية مش شرط تكون دبدوب او خاتم او سلسلة او محفظة او شنطة او ورد او شيكولاتة او برفيوم ولا شرط تكون غالية

الهدية مش بثمنها لا الهدية بقيمتها

 الهدية ممكن تكون كلمة حلوة او نظرة حلوة او أبتسامة حلوة او تقدير لحبيبك او رعاية وأهتمام

هى دى أجمل من أى هدية مهما كانت او كان ثمنها

وأحب أذكركم أننا ک مسلمين مش عندنا غير ٣ أعياد بس

١-عيد الاضحى "العيد الكبير"

٢-عيد الفطر "العيد الصغير"

٣-يوم الجمعة 

فبلاش تعتبروه عيد من ضمن اعيادنا 

ولو يوم ١٤- ٢ عيد الحب بجد وكلنا المفروض نحتفل بيه 

كان رسول الله صل الله عليه وسلم أعترف بيه وأحتفل بيه جيبوا نص من القرءآن الكريم او حديث عن الاحتفال بعيد الحب واحنا نصدق ونحتفل بيه

لكن بدون دليل واضح يبقى مش ينفع تفرضوه علينا وعايزينا نعترف بيه

احنا أيامنا كلها أعياد للحب ومش محتاجين نحتفل بيوم محدد كعيد للحب

أيوة أيامنا كلها حب 

حب الله سبحانه وتعالى

وحب الرسول الكريم صل الله عليه وسلم

وحب الأنبياء والرسل عليهم السلام 

وحب الوطن

وحب الوالدين 

وحب الأخوات

وحب الازواج 

وحب الابناء

وحب الأهل 

وحب الاصدقاء

وحب البشرية جميعاً

ومش محتاجين يوم لعيد الحب ولا يوم لعيد الام ولا يوم شم النسيم ولا أى حاجة من الحاجات دى 

بالنسبة لعيد الام هو كمان احنا مش محتاجينه عارفين ليه لاننا بنهتم بامهاتنا كل يوم وبنعترف بحقهم علينا وبنحاول نرد ولو جزء صغير من فضلهم علينا كل يوم فمش محتاجين يوم معين عشان نحتفل بيه ونجيبلهم هدايا ونعبر عن حبنا 

إذا كان الاجانب بيضعوا امهاتهم فى دار رعاية او بيبعدوا عنهم وبيرحوا يزروهم كل فترة وعملولهم يوم ٢١ مارس عشان يفرحوهم

فأحنا عايشين مع أهلينا ولو الظروف بعدتنا بنزورهم كل يوم او على الاقل يوم ويوم لكن لازم كل يوم نكلمهم ونطمن عليهم ونطمنهم علينا فمش محتاجين يوم عشان نحتفل ونعبر عن حبنا 

ياريت كلنا نفكر شوية ونبطل عادة التقليد الأعمى للغرب لان مش كل حاجة مناسبة ليهم مناسبة لينا ولا كل حاجة مناسبة لينا هتكون مناسبة ليهم لان لكل شعب ثقافة وعادات وتقاليد فبلاش نتبع عاهاتهم وتقاليعهم نعم عاهات وتقاليع وليست عادات وتقاليد 

ياريت نفوق من اللى أحنا فيه 

طبعا ناس كتير مش هيعجبها كلامى وهتقول معقد/ة او سينجل/ة ومش لاقي/ة اللى يجيب هدية لا إذا كان على الهدايا لو محتاج/ة هتجي كتير قوى أكتر ما تتصوروا

 بس ده مبدأ انى نفسى أدخل الجنة ومش عايز/ة أزود من سيئاتى 

وأنتوا كمان أكيد نفسكوا تدخلوا الجنة ومش عايزين تزودوا من سيئاتكم فبلاش تزودوها بالاحتفال باليوم ده ولو حابين تحتفلوا أحتفلوا كل يوم بحبكوا لو عايزين تحددوا يوم تحتفلوا بيه حددوا ذكرى حبكم أنتم يوم خطوبتكم او يوم زواجكم 

لكن بلاش تقلدوهم تحتفلوا باليوم ده

انا حبيت أنصحكم لان الدين معاملة ونصيحة

وحبيت أخد ثواب 

أنا قولت رأيى وما يمليه على ضميرى وأنتم أحرار

اللهم بلغت فاللهم فأشهد